Num 20 | PMA | STEP | En avati koa mulamu ten sua hau, me-Isrel keil umai en out volvol ten out Saen, ka amumon votevav one en out koa avise en Kates. Ka en out enek, Miriam, ahinali Mosis, mat ka arahini.

Numbers 20

En Out Memes, Oai Kistal Ran Ahat

Namba 20:1-12

1 En avati koa mulamu ten sua hau, me-Isrel keil umai en out volvol ten out Saen, ka amumon votevav one en out koa avise en Kates. Ka en out enek, Miriam, ahinali Mosis, mat ka arahini. 2 En out koa aro ien, oai tovuol ka meatin keil umai aka rahit Mosis ka Eron 3 ka aselus kutut kat Mosis avit, “Tahos imok keke komai mivamatmat en hen Iahova, navong mu vini onomai keil en metareh ten Eim Tavolin onen. 4 ?Vensa komulamun komai memai en out volvol ekek keke mevamatmat vatal min tirendan somai keil? 5 ?Vensa komulamun komai romemea ran out Isip keke romai en out koa vi heite hon? ?Kilesi? Ekonek, anien tovuol ka heiai tovuol. ^{▼▼20:5 Selusien vit uit, fik, grep, ka pomegranit.} !Ka oai tovuol emun rovamuni!” 6 Mosis ka Eron lumea ran meatin keil ka luvati keilu en metareh ten Eim Tavolin. Luvita netan, naealu vita rokol atan, ka lules muohien onen Iahova ritin kistal en keilu.

7 Iahova viteni min Mosis vit, 8 “Kikur eisal onom ka milhehiteni min meatin keil imai out hetas. En mete, kiselus min mari ahat en vili kei va keke oai voue rani. En sakien enek, kisan oai min keil imuni ka min tirendan emun keil ese.”

9 Sakini Mosis va, kur eisal onen ran Eim Tavolin suval koa Iahova meng kati. 10 Evus, Mosis ka Eron luvise ruain meatin keil uva vesesal ven mari ahat enek, ka Mosis selus keih min keil vit, “!Kami koa mivi uti selkututien, mihetaengonau! ?Mukave, milhekur oai ran ahat ekek ven kami?” 11 Evus, Mosis mutelan eisal koa vuli kati, muas ahat enek eni hatte elu, ka mari oai mue rani. Sakini, meatin keil vasi amuni ral min tirendan keil ese.

12 Ka Iahova viteni min Mosis ka Eron vit, “Ven desien onamil enau rovinvintei keke milvahouhou en hivotutien onak en meten me-Isrel keil keke milromusil kattei asa naviteni, milhermulamuntei mun keil iha en atan koa inau navat kati min keil.”

Matien Onen Eron

Namba 20:22-29

22 Me-Isrel vasi keil alokovein out Kates ka uva akistal en Vatihou Hor. 23 Ekonek, en hakot ten out Edom, Iahova viteni min Mosis ka Eron vit, 24 “Eron hervatei en atan koa navat kati min me-Isrel keil. Kei hemat veni kamil milromusil kattei asa nameng kati min kamil en out Meribah. 25 Sakini kikur Eron hetal Eliesar koa vi natnali, mithehina en Vatihou Hor. 26 Ekonek, kikulat eisin keil ten pris ran Eron, kisin eni en Eliesar. Ka Eron, kei hemat en out enek.”

27 Mosis musil asa koa Iahova meng kati mini. Ka en meten meatin vasi keil, keitel telvina en Vatihou Hor. 28 Ka Mosis kulat eisin ten pris ran Eron ka musin en Eliesar eni. Ka en out enek, en hoi hou nesa, Eron mat, ka Mosis keilu Eliesar lumita ris netan. 29 Navong me-Isrel vasi keil akur longlongien keke Eron mat, keil vasi arangisi, ka araleh matien veni avong hanumau tai ka halualim emun (30).